民建聯立法會議員公務繁忙，為方便同市民聯絡，特設「網上辦公室」，該網站除個人資料、活動照片同媒體專訪內容之外，撳入「聯絡我們」一欄亦羅列多個辦事處聯絡電話。不過今日中午有網民發現登入唔到網站，畫面更顯示原因係費用未付。
其他報道：報道指霸王洗髮水含致癌物被控誹謗 壹週刊賠300萬元
facebook群組「家在小西灣」今午有人發現鍾樹根嘅網站未能登入，取笑佢「自己網頁都捍衛唔到，點捍衛市民利益呀？」Emily於是撳入網址，同樣未能登入，畫面顯示「費用逾期未付～請與管理員聯繫！」
Emily馬上向鍾樹根查詢，原來佢對網上辦公室未能運作一事唔知情，話要先行了解，其後有網民喺fb分享有關消息時特意tag埋鍾樹根嘅fb帳戶，結果約兩小時後網站開通番，一按網址即重新可見鍾樹根的大頭照，其他連結亦回復正常。
鍾樹根亦即時網上報喜，先後喺「家在小西灣」專頁及tag咗佢嘅網民帖文中公布網站回復正常嘅好消息，並多謝大家關心；其中專頁留言「多謝鍾議員關心本專頁關心你」，他又再回應「多謝貴專頁關心本人專頁」，十分搞笑。
鍾樹根其後向本報解釋，話事件緣於服務供應商出現誤會，「可能佢啲數亂咗」，佢話一獲知消息即向對方了解，短時間內已解決問題。不過究竟網站幾時開始出事，佢就話只肯定琴日登入都冇事，實際死網時間就唔知啦，「點會成日睇住個網，宜家啲人都係睇fb多過睇網架啦！」
相關字詞﹕Emily Online 編輯推介