【Emily Online】點睇吳克儉連任？　教聯副會長蔡若蓮：睇唔到有咩理由要佢做多屆喎 (18:05)

教聯會副會長蔡若蓮今日開記招，話最遲6月底宣布係咪參選立法會教育界功能組別議席，講到近年教育，佢批評制度過時，「要罵局長（吳克儉），局長一日未落台，一日都要佢做嘢」，有記者問佢點睇吳克儉連任，蔡即時好詫異咁講「我睇唔到有咩理由要佢做多屆喎」。

講完局長又點少得講埋特首，蔡話「欣賞特首勤力做到嘢」，不過溝通能力就有改進空間，仲話「香港應該要有個好啲嘅特首」，要民望高同勤政愛民，唔知CY有冇呢兩個條件呢？

蔡若蓮做過教育局教育局高級學校發展主任、課程發展處高級課程主任，現任褔建中學（小西灣）校長，加上教聯背景，唔多唔少都有啲建制味，但蔡話自己屬於「中間派」，又叫大家唔好因為褔建中學係「左校」而將佢標籤做某一派別。

蔡現時正爭取教聯會支持，但教聯講明唔會派人出選，換言之如果蔡決定參選，就將會以個人名義出選，「為教育而戰」咁話。