去年重現中環海濱嘅荔園，今年暑假又番嚟啦。大會啱啱公布喺7月15日至8月7日期間荔園重臨，但市民要留意，今年會轉場去亞洲博覽館，而同舊年最大分別係，大會將收取入場費，周一至周四收140元(包10個代幣)，周五至周日中午12點前入場收費一樣，12點後入場就收180元(包12個代幣)，3歲以下兒童免費，65歲以上長者收費則分別為70及90元，下月開始售票。
其他報道：陳佐堅再發聲明指城大誤導公眾 稱只曾為工程公司提供書面意見
大會公布活動將於亞博館佔地8000平方米嘅戶外貨車調校區，及11,000平方米嘅室內8號及10號展館舉行，設超過20個遊戲設施及景點，經典的掟階磚、吸蕉大笨象及碰碰車當然繼續有得玩，亦會增設全港首個室內最長、佔地1700平方米充氣競技遊戲「充氣大暴走」。
戶外將設全港首個電動高卡車車場，引入德國RiMO全新電動高卡車，等市民一嘗賽車手滋味。賽道由米高舒密加賽道設計師Michael Kolbinger設計，長650米，時速達每小時50公里，過程歷時45分鐘，包括8分鐘賽車，其餘為安全訓練及穿戴安全裝備。
大會提醒有興趣玩高卡車嘅人士必須網上預購280元門票，而圈速最快者更可獲2張國際汽聯電動方程式錦標賽香港分站Grand Stand門票。
荔園有限公司主席邱達根話，轉場主要考慮到天氣因素，無預計到人流會有多少；至於日數由舊年70日減至24日，係汲取經驗而作出調整，活動時間已覆蓋暑假黃金檔期。
被問到為何較去年少咗懷舊元素，邱達根話「想表達創新」，須與時並進。至於為何引入電動高卡車，他認為意念創新及可照顧不同人嘅需要。