《警訊》多年嚟都深受觀眾歡迎,其中一個原因一定係佢識「抽水」,好似前晚嗰集咁,內容講警方點樣應對非法入境者嘅問題,當中就融入咗「李波事件」同特首嘅「行李風波」,唔怪得之網民咁「like」啦!
其他報道:【港獨爭拗】張榮順指中央「要槍有槍要炮有炮」 譚惠珠解畫:排除咗用武力
大嶼山四面環海,容易成為非法入境者嘅目標,「警方呼籲」環節就模擬非法入境者偷渡來港,3個偷渡者喺大嶼山登陸,其中一個人因為隻船太快暈船浪,蛇頭就話「載得你哋呢啲用自己方法偷渡嚟香港嘅人,梗係要搵架快啲嘅艇啦!」而暈船浪嗰位偷渡者本身喺鄉下賣書維生,所以連偷渡都仲帶住成袋書。
之後佢地諗住搭的士出東涌,點知上咗車之後,其中一個偷渡者先醒起漏咗個篋喺出面,問蛇頭可唔可以幫佢攞番,點知蛇頭一口拒絕,「個篋係你自己嘅,你自己識行梗係自己攞啦!」點知,個偷渡者拎咗部電話出嚟叫蛇頭聽,仲話「唔係我老豆嚟架,你聽下先」,一聽原來係「登登登登!登登登登」,貝多芬嘅命運交響曲嚟嘅?原來個偷渡者好貼心,見個蛇頭咁躁,想佢聽下音樂平伏下心情,最終佢都要自己落車拎番個篋。
相關片段:http://podcast.rthk.hk/podcast/item_epi.php?pid=144