近年假新聞滿天飛，唔少政界人士都身受其害。話說深水埗區議會主席楊彧喺FB出post，話建制群組流傳影片，指控佢喺台灣「飲花酒」、用公帑吃喝玩樂，佢就澄清「唔係短頭髮戴眼鏡眼細細男性就係我嚟嘅，咁攪（搞）法全香港應該有好多個楊彧」。
Emily睇過段短片，片中男子同一大班人食飯，其間有一個性感女郎助興，片中男子雖然同楊彧一樣都係眼細、戴眼鏡，但其實兩人唔太似樣，阿彧個樣比較斯文。阿彧就忍唔住喺facebook話，自己睇到條片，當堂嚇一跳，然後得啖笑，又呻自己今日（18日）好忙，先去勞工處幫街坊追討欠薪，又參觀口罩工場、同其他區議員開會，到下晝4點都未食晏，仲要特意澄清呢件事。
阿彧向Emily講，建制群組傳播得好快，佢又呼籲，唔好再用假新聞去詆譭佢同其他人。阿彧又笑住話自己「真係好鐘意玩女」，講緊係佢14個月大嘅囡囡呀。