建制派嘅另類「分離主義」好似愈嚟愈浮上面,立法會議員鍾樹根因為被黨拒絕畀佢喺立法會選戰名單以首位出戰港島,可能同民建聯「分離」、獨立出選,連自由黨榮譽主席田北俊都喺Facebook好關心樹根去向,仲提出一個建議。
田少Facebook以「無知的田毛毛」署名一封畀「Tree根毛毛」嘅信,講到近期見到樹根Facebook抽香港眾志黃之鋒水籌錢,認為都幾有創意,但創意唔能夠令佢代表民記出選,「同自己人反面其實也不好」。
「田毛毛」就建議樹根,不如叫新民黨主席葉劉淑儀唔好選,讓返個港島位,民記出返兩隊,「皆大歡喜!橫掂作為尊貴行會議員的她,投票意向與你都是一樣。選民選你好過啦」。
識睇一定睇hashtag,田毛毛就tag咗「#路過 #有人目標志在特首 #你先係親生仔 #振作啊 #根毛毛 #要本土不要分離」,網民都留言話呢個真係「Harshtag」。