民建聯近排見報率好高，一粒「耳瘜肉」都令到「前任大佬」登上頭版，而主張「要本土不要分離」嘅立法會議員鍾樹根，被黨拒絕排喺立法會參選名單首位出戰港島後，講明考慮同民建聯「分離」，都令到好多人關注。
鍾樹根今早接受商台節目訪問時，被問到有冇問候過被質疑「打尖」做手術嘅黨友譚耀宗（譚Sir），佢就直言冇問候過，又話「可能我都係一粒瘜肉」；主持人就問「被切除未？」，「我諗都將近切緊」。主持人又問到之前知唔知譚Sir有瘜肉，「唔知喎，我唔係佢條蟲」。Tree Gun連串金句令到幾個主持人笑聲不斷。
Tree Gun又話自己未試過喺公院可以排快啲睇醫生，從來都冇要求，如果譚Sir事件屬實，「可能係長者，所以畀佢快啲做」，認為現今社會都唔應該有咩特權。
講番同民建聯可能會「分離」，佢就話由今個月尾到報名前會有決定，而家需要計算勝算同資源問題，預計獨立參選要用100萬至150萬，到時可能要問家人借。
如果曾鈺成或譚耀宗仍然做緊民建聯主席，處理會有唔同？Tree Gun認為可能會唔同，因為性格唔同，曾鈺成會支持佢。即係同現任主席李慧琼冇以前咁親密，所以有呢個決定？「唔關事，關係冇話邊個好唔好，大家都係咁做嘢」。如果獨立參選又會唔會先同中聯辦溝通？「點解要同佢溝通，關佢咩事？佢哋好少搵我，多數係國內活動」。
其他報道：李慧琼稱「政治殘忍」 鍾樹根：對任何人都會殘忍，幾時落到佢身上架啫