土瓜灣馬坑涌道華發大廈今晚(6日)被列為「受限區域」,大廈地下的雜貨店早早關門,店主稱下午5時多已收到封區消息。另有居民稱封區準則模糊,「山頂又唔見佢封吓?」
昨日(5日)華發大廈出現一宗源頭不明個案,被納入強制檢測大廈名單。華發大廈地下商場「華發大廈商場」十多間商店,在下午約6時半只剩下林太一戶未走。林太稱自己住土瓜灣,其經營的「華順雜貨」每晚通常9時多、10時關門,今日因收到封區消息,加上見到大批記者感害怕,所以亦決定落閘。她稱疫情前每日賺幾千元生意,最近華發大廈有源頭不明個案,每日生意少了千多元。同一條街另一間食品店亦在門外貼上告示,寫道「因突發狀況,本店提早於現在關門」。
華發大廈居民李先生稱,封區時會在家不外出,「無乜嘢,政府嘅嘢都無法子,都要咁做呀,唔係點」。他又稱「我希望其他區都封下啦,唔好淨係封平民區。封起上嚟壽臣山道又封吓,赤柱又封吓」;他覺得有少少不公平,封區無標準,「依家封來封去都係深水埗、土瓜灣、旺角,山頂唔見佢封吓,馬己仙峽道又封吓啦!嗰啲有錢佬就知道煩,我哋而家講煩冇用㗎」。