近年唔少建制派政治人物都玩facebook，民建聯立法會議員鍾樹根嘅FB個人專頁like數雖然少過公認叻玩FB嘅田大少田北俊，但都有超過8000個likes。不過，今日佢喺電台節目被問到自評玩FB有幾多分時，鍾樹根就話「僅僅合格」。
鍾樹根今日喺DBC電台同主持人傾到玩FB，佢自言起步較慢，今年開始先重視社交媒體，由最初職員自己做，到後來請年輕人幫手改圖。如果玩到田少級數係10分嘅話，Tree Gun認為自己玩FB僅僅合格，「最緊要知恥近乎勇，繼續努力」。
講到田大少FB抽水咁得民心，主持人問Tree Gun會唔會抽埋一份？佢就笑住話「要向先進單位學習吓」，又話佢要抽水嘅話其實冇乜禁區，主要係個人性格問題，但認為抽水有好多種，「幽默咁抽又得，要尖酸刻薄咁抽，呢啲唔係我哋性格」。
相關字詞﹕Emily Online 鍾樹根 編輯推介