【明報專訊】港鐵主席馬時亨出身基層家庭，細個無錢畀學費，全靠小學班主任接濟，先可以繼續學業。受過人哋恩情，令馬時亨都想出力幫窮學生。本身係香港教育大學校董會主席嘅馬時亨，噚日同校長張仁良喺宿舍與11名賽馬會獎學金得獎人茶敘，包括曾以獎學金到外國留學嘅葉慧儀（Bibi）同梁鈺鈿（Yvett），兩人席間提到，當年雖然已有獎學金，但要應付去外國讀書嘅學費同埋生活費，經濟上都有啲緊張。馬時亨當時了解過後，除咗自掏腰包資助佢哋，仲立即連繫有心人，幫兩個女生籌學費同生活費，等佢哋順利升學。
