【明報專訊】去旅遊少不免住酒店，以往坊間有傳言話走廊盡頭嘅房間陰氣較重，最好唔好住，不過，香港專業教育學院（IVE）（黃克競）酒店及旅遊系系主任張俊文就話，呢啲房因為設計格局考慮，可能面積都會較大，反而有機會景觀開揚啲。而如果大家想睇吓間房嘅衛生程度，可先留意房內玻璃杯有無手指印，因為專業房務人員係唔會喺玻璃杯留下指模嘅；然後亦可檢查一下枕頭套有無更換，換過嘅枕頭套通常都熨貼整齊。另外，牀頭板及燈罩頂係咪一塵不染等細節，都顯示到酒店房務清潔嘅專業程度。
