【明報專訊】林鄭月娥班子上任一周年，繼特首後，政務司長張建宗、教育局長楊潤雄、民政事務局長劉江華、政制及內地事務局長聶德權噚日亦喺facebook上載短片，用不同方式回顧一年工作，做教育嘅楊潤雄就走入校園，唔少片段都係佢同小朋友互動。佢旁述過去一年推出咗多項教育政策等，片中坐喺楊隔籬嘅一名幼稚園男童好搶鏡，唔知係咪局長講得太長氣呢，呢位小朋友不時呆咗咁望向局長，一副唔明白嘅可愛表情。楊潤雄嘅帖文又好潮咁hashtag咗6首歌，歌名打直睇玩食字，第一個字就串連成「感謝一路同彳（行）」（最後一首歌係《彳亍》）。