【明報專訊】浸大國際新聞四年級學生張家寶同戴仲儀喺亞洲數碼新聞大專賽中分別拎到冠軍同亞軍！家寶話，唔少新聞報道話喺香港要拍拖非常難，因為兩性唔平等、對伴侶期望太高等。所以佢決定深入探討大家用Tinder等交友Apps搵男女朋友嘅現象。佢話，花最多時間搵受訪者同分析相關數據，又為咗呈現受訪者感受而絞盡腦汁！對於最終獲獎，佢話對自己喺傳媒業發展帶嚟重大意義！仲儀就話，對拎獎感到喜出望外。佢覺得，好難喺香港有合理嘅居所。為咗了解喺香港置業嘅困難，佢嘅作品除咗用數據顯示香港樓價不斷升不斷升，仲特別邀請咗5個受訪者，包括前露宿者、巴基斯坦裔建築工人同新婚人士等，講吓佢哋嘅理想住所，用人性化角度探討房屋課題。除咗恭喜兩位，Emily想問吓仲儀，點解唔訪問我啊？
