【明報專訊】會員突破10萬嘅香港教育專業人員協會（教協）本周六慶祝成立45周年，教協係工會組織，原來都攞正牌出「報紙」，其《教協報》有向報刊註冊處註冊，屬本地註冊期刊。報刊雜誌成日改版，但Emily問教協攞份《教協報》創刊號嚟睇，發現報頭字樣無變過，原來報頭係由朱溥生（作家阿濃）嘅爸爸朱敬安題字，44年沿用至今；據已故創會會長司徒華舊文章提及，朱敬安係教協嘅擁躉。
