港聞

港聞二

下一篇
上一篇

任何仁又惹「最後一集」恐慌

【明報專訊】消防處宣傳角色「任何仁」( 洋名Anyone)一身藍色緊身裝束造型,引起網民瘋傳同討論,從宣傳角度似乎都幾成功,其實消防處都係想教大家心肺復蘇法(CPR)啫。噚日消防處嘅facebook專頁出咗新片推廣,今次搵嚟香港拳王曹星如亮相,片中曹星如問「任何仁」可唔可以睇吓佢個樣,「任何仁」就話今次係「最後一集」,所以就畀大家睇吓佢個樣。點知除咗頭套嘅「任何仁」,都係曹星如嚟嘅,佢話「只要你敢,任何人都可以救人」。

「任何仁」喺短片藉一個虛構故事,除咗教人做心肺復蘇法同用AED機,亦呼籲市民唔好擔心急救會導致病人情况愈嚟愈差,鼓勵大家:「只要你敢,你救返嘅唔止係一條人命,仲救返個細路仔嘅家。」

伙曹星如演出新片

短片出街後,唔少網民針對「最後一集」發表意見,擔心「任何仁」會「被消失」,紛紛話「唔可以係最後一集㗎!畀返呀任何人我哋」、「點解係最後一集呀?仲想睇喎」、「最後一集係咪指擊活人心系列最後一集呀」等。

任何仁形象已深入民心,噚日Emily喺銅鑼灣見到有消防行動,路過之際見到有巿民講起,「點解唔見任何仁!」

相關字詞﹕任何仁 消防處

上 / 下一篇新聞