港聞

港聞二

下一篇
上一篇

盈盈樂樂無所出 研送返四川繁殖

【明報專訊】大熊貓盈盈、樂樂2007年嚟香港,一直無法開枝散葉,四川省林業廳廳長劉宏葆噚日喺海洋公園活動話,可研究係咪應送佢哋返四川臥龍繁殖。

劉宏葆話,野生熊貓天生繁殖能力低,圈養嘅大熊貓繁殖能力更只有野生嘅26%,加上大熊貓最佳繁殖溫度為-10℃至25℃,香港地理氣候始終不如四川,「已經是一個難題」。四川林業廳將同香港及海洋公園嚟緊會研究,使唔使送盈盈、樂樂返臥龍交配,但熊貓繁殖期要130日,加上技術安排,隨時大熊貓可能需離港接近一年。

若真係暫時送走盈盈樂樂,劉宏葆話會考慮喺嗰個時段安排另外兩隻大熊貓暫時到港,以免「熊貓粉絲」失望,但需再溝通商量,相信努力後會有令人滿意嘅結果。過往海洋公園扭盡六壬安排盈盈樂樂交配,一直搞唔掂。2015年5月園方曾安排盈盈去四川參與全國大熊貓繁殖計劃,與臥龍熊貓津柯5次自然交配及接受人工受精,可惜同年10月宣布盈盈流產。

相關字詞﹕海洋公園 熊貓 盈盈樂樂

上 / 下一篇新聞