港聞

港聞二

下一篇
上一篇

許智峯自備大聲公 區會再流會

【明報專訊】民主黨中西區區議員許智峯不時因為抗爭而令區議會流會,噚日中西區區議會交通及運輸委員會開會,會議原定討論中環灣仔繞道工程進度、通車安排等,阿峯「有備而來」,帶埋自家大聲公開會,擾攘一個幾鐘頭後,區議會就流會。

民建聯區議員陳學鋒、楊學明分別喺facebook批評阿峯嘅行徑浪費區議會時間。陳學鋒同Emily講番事發經過,事緣議員會前可以入文件,要求討論區內唔同相關事情,許智峯就要求加入討論沙中線事宜,主持會議嘅陳財喜拒絕,被阿峯批評主席唔公道,並拎出大聲公同主席鬥大聲,會議擾攘咗個幾鐘,許智峯唔肯離場,主席亦表明無保安等,「無本事」趕對方離開,又禁止唔到阿峯用大聲公,最終宣布流會。

阿峯就同Emily講,佢跟足程序、10月底已提交文件要求討論,要求立法會引用特權法查沙中線,但早前區議會出嘅會議議程上無呢一項,所以上周已同主席講明,唔批加入呢個議程就會即席抗議,質疑主席濫權及唔肯處理政治問題。佢話過往區議會都好似錄音機咁,主持會議嘅只會重複決定,唔畀佢講,故唯有開會自備大聲公引起關注。

陳學鋒話,原定會議有多項議程待討論,流會令所有議程都處理唔到,下次會議要等到下年1月底。

相關字詞﹕流會 區議會 許智峯

上 / 下一篇新聞