港聞

港聞二

下一篇
上一篇

150周年校慶 拔萃饒公書畫展 珍藏公開

【明報專訊】拔萃男書院迎來150周年校慶,噚日開幕嘅《桃李萅華——拔萃》饒宗頤教授書畫展係重點活動之一。展覽展出24組已故國學大師饒宗頤嘅作品,除咗有香港中文大學借出嘅畫作同書法作品,仲會展出兩幅饒公早年送畀男拔嘅墨寶。Emily聽聞,呢兩幅作品一直珍藏喺校長室同校長會見室,所以今次展覽係首次公開展出㗎。

放校長室墨寶首公開展出

兩幅饒公嘅墨寶分別寫咗「桃李萅華」(萅,春的古字)同「拔萃」,係饒公分別喺2009年同2013年校慶期間親筆寫畀男拔,前者係讚賞男拔桃李滿門,後者係為男拔校名親自提筆。為咗紀念饒公心意,男拔都用咗呢兩幅橫幅作為書畫展嘅名,向呢位教育界前輩致敬。

其餘四大類展品由中大文物及藝術館、中大藝術系借出,包括﹕一、饒公同中大學者交流嘅作品,當中展出有饒公自家風格嘅隸書作品;二、饒公1980年代初臨摹古代書法家嘅作品,包括懷素嘅《大草千字文》;三、饒公喺80至90年代創作嘅水墨作品;四、饒公喺中大藝術系授課時示範嘅山水畫作。

饒宗頤教授書畫展喺拔萃男書院藝術中心The Verdant Arts Centre舉行,即日起至12月2日開放畀公眾免費參觀,開放時間為周一至周日上晝9點至下晝5點。

相關字詞﹕校慶 書畫展 國學大師 饒宗頤 拔萃男書院

上 / 下一篇新聞