港聞

港聞二

下一篇
上一篇

去造勢會獲500元禮券? 陳凱欣團隊:無發此信息

【明報專訊】九龍西立法會補選仲有兩個幾星期就投票,香港眾志秘書長黃之鋒噚日喺facebook上載咗兩張微信群組對話截圖,截圖中一個叫孔巍嘅人話「選出愛國愛港人士進入立法會將對香港的繁榮穩定起非常重要的作用」,冀魯旅港同鄉會決定全力支持陳凱欣參選(圖)。信息又提到,陳凱欣下星期二喺深水埗有造勢大會,為陳凱欣「加油助威」,動員群組內嘅青年踴躍報名參加,仲話「參加人員將有價值500元的惠康禮券回饋」。黃之鋒質疑係「疑似賄選」。

群組中一個叫王家惠嘅人最先回覆,名字與冀魯旅港同鄉會現任理事長王家惠同名,亦係香港樂天集團董事長、山東省政協常委,Emily至噚日未有方法聯絡佢求證。陳凱欣競選團隊就以WhatsApp回覆Emily,話團隊並無發出有關信息,亦不知情,有關團體亦不在邀請出席名單上。

根據中共山東省委統戰部嘅資料,冀魯旅港同鄉會喺1948年成立,係擁有4000多名成員嘅愛國愛港社團。九龍西補選候選人還有李卓人、馮檢基、曾麗文同伍廸希。

相關字詞﹕伍廸希 曾麗文 李卓人 馮檢基 陳凱欣 九龍西立法會補選

上 / 下一篇新聞