港聞

港聞二

下一篇
上一篇

無被消失 任何仁現身報平安

【明報專訊】消防處宣傳救人意識嘅虛擬角色「任何仁」登場後,旋即成為網絡紅人,前晚一度傳出消防內部不滿,真人版「任何仁」會被消失,網民不停喺網絡留言要拯救佢。消防處社區應急準備課高級消防區長黃宏亮噚日大派「定心丸」,澄清「任何仁」無被「DQ」,仲不排除會落區宣傳𠻹。「任何仁」噚日喺消防處facebook現身報平安,相中嘅佢淡定歎茶,但瘦晒喎,唔通太大壓力?

「老細都唔知幾玩得」

早兩日有網民留言曾提到,任何仁嘅造型有啲似日本情色電影角色,任何仁噚日喺fb現身時都好玩得,個post以【任何仁の日常】為題,佢提到「呢排做到好攰,瞓到好晏 啱啱先起身,所以唔知發生乜事?」,hashtag講明係「任何仁報平安」,仲話「老細都唔知幾玩得」,又提到「呢幾日太忙,想游個水鬆下,但太平洋都被抽乾」。佢仲提醒市民「唔好錯重點,應急三識先係焦點」。

黃宏亮喺商台《在晴朗的一天出發》多謝市民支持「任何仁」,助信息成功進入社區,引起迴響,「成個團隊好開心,好入到市民心裏」,呼籲市民留意「任何仁」動向。至於內部係咪有高層表達不滿,佢話最近製作咗多段宣傳片,高層畀咗好大創作空間。

上 / 下一篇新聞