港聞

港聞二

下一篇
上一篇

巴馬丹拿賀150周年 港經典建築草圖捐出

【明報專訊】於1868年成立嘅著名國際建築及工程顧問公司「巴馬丹拿集團」(P&T Group),今年邁進150周年紀念,為慶祝大日子,P&T舉辦一連串活動,主題為「築城‧承築」,噚日率先同Emily等傳媒行家分享活動細節。

有份設計置地怡和彩虹邨

P&T負責過唔少本港著名建築物嘅設計,包括置地廣場、怡和大廈、交易廣場、畢打行等,亦參與多項私人屋苑同公營房屋嘅設計,包括彩虹邨、祖堯邨、穗禾苑等;唔少同市民生活息息相關嘅社區設施,如維園泳池、科學館、將軍澳單車館等,設計亦係出自P&T,呢啲手稿、建築草圖、施工圖等都成為珍貴嘅歷史文獻。

辦導賞團講中環故事

P&T董事陳祖聲話,從過往手稿、建築草圖等,可以睇到唔少當年社會嘅文化、建築理念,以至香港如何由殖民地建構至現時情况等,為咗傳承呢份歷史同建築使命,P&T決定向香港大學同西九文化區M+博物館,捐出建築草圖、手稿真迹等作為永久收藏,包括當年興建交易廣場、怡和大廈等草圖,作為學術研究同展覽用途,並於本月20日喺中環藝穗會舉行簽約儀式,同場亦會舉行展覽同研討會作進一步介紹。

另外,P&T同活現香港(Walk in Hong Kong)合作,喺本月24日同12月1日兩個禮拜六舉辦公眾導賞團,透過游走中環區嘅行人天橋介紹多個著名地標,包括怡和大廈、交易廣場、置地廣場等嘅設計,以及不為人知嘅設計故事,希望令市民更了解中環發展史。

上 / 下一篇新聞