港聞

港聞二

下一篇
上一篇

免市民不知情「吃毒」 黃碧雲想知大麻管制情况

【明報專訊】近年唔少地方推行大麻合法化,引起港人熱議,原來立法會議員黃碧雲都關注呢個議題,並向立會申請蒐集資料。事緣立法會資訊研究部有名額,做由議員建議題目嘅專題研究同資料蒐研工作,議員都好踴躍,有32人提出建議,其中碧雲就關注「有關各國大麻合法化的情况,包括種植及銷售,及製造和生產含大麻成分的食品及飲料的管制情况」,唔通佢想推動大麻合法化?

碧雲話佢反對大麻合法化,但暑假時去咗多倫多,眼見當地通過大麻合法化後開始有食物、飲品混入大麻成分,甚至可口可樂公司都有意研發大麻可樂,令唔少市民向佢反映,擔心不知情下食咗落肚、影響健康,碧雲都有憂慮,「明刀明槍(大麻)法例擋到,但mix咗入食品、飲品,可能有灰色地帶」,所以希望研究部幫手搵資料,睇吓現時有冇足夠法例規管、阻截入口,同埋海關嘅執法情况。

部分議員則提出同業界有關建議,好似飲食界張宇人關心其他地方廚餘廠嘅議題,鄉議局主席劉業強就關心填海造地,醫學界陳沛然就提出比較香港同世界大城市醫療服務。

相關字詞﹕大麻合法化 黃碧雲 大麻 emily

上 / 下一篇新聞