港聞

港聞二

下一篇
上一篇

消防角色教CPR 名叫Anyone 藍士熱爆 人人變身「任何仁」

【明報專訊】消防處上個月成立咗新部門「社區應急準備課」,負責宣傳同公眾教育,噚日啟用官方facebook page(香港消防處 Hong Kong Fire Services Department)同網民互動,透過網上平台向公眾灌輸一啲急救技巧同應變方法。消防處仲派出宣傳角色「任何仁」(英文名Anyone)教大家心肺復蘇法(CPR),由於佢一身藍色緊身裝束、阿凡達咁嘅造型太特別喇,引來網民瘋傳同討論,更已有人幫佢開咗facebook page,所以大家喺fb見到「任何仁」專頁,留意其實唔係消防處開設㗎!

消防處噚日開記者會宣布正式啟用官方facebook page,高級消防區長(社區應急準備)黃宏亮同Emily講,希望透過網上平台加強市民嘅危機同救援意識,萬一遇到大型事故、天災人禍或恐怖襲擊時,都唔會騰晒雞乜都唔識做。

網民即開「任何仁」專頁

佢仲請嚟特別嘉賓「任何仁」即席示範點樣「敢就救到人」,令大家明白只要夠膽做、臨危不亂,任何人都可以救人,例如為病人做CPR、用滅火筒救火,及時減低現場風險。

其實「任何仁」早喺8月已經「出道」,當時佢伙拍藝人羅蘭姐,rap住教大家正確嘅CPR手勢,成功出位,加上噚日傳媒報道,令佢「仁」氣急升,唔少人加入抽水行列,連大嘥鬼都抽埋一份,更有網民幫佢開咗facebook page,至噚晚已有逾1400個Like!有人關注點解「任何仁」要著緊身衫,出面再加條PE褲咁奇特,Emily所知,原來消防處最初構思「任何仁」個角色,主要想帶出「任何人都可以救人」呢個信息,所以一於蒙面唔出樣,加上輕便裝束方便救人,造就咗今日呢個造型喇。

相關字詞﹕心肺復蘇法 任何仁 消防處 社區應急準備課

上 / 下一篇新聞