港聞

港聞二

下一篇
上一篇

講明唔抱 譚文豪同仔女初戰跑步賽

【明報專訊】為人父母周末少不免要煩惱同仔女去邊好,公民黨立法會議員譚文豪(Jeremy)噚日就同老婆、一對仔女入迪士尼樂園參加3公里跑步賽。Jeremy話𠵱家一對仔女4歲幾,覺得差唔多大,所以報名參加。為咗今次活動,佢哋一家非常認真,前一晚特登開家庭大會,同仔女講明就算跑到攰都唔可以扭計要抱,最多只能夠行,最終仔女有三分之一時間跑、其他都係行為主,其間又走去同卡通人物影相,結果3公里比賽用咗1小時7分鐘40秒完成。

掛住影相 3公里「跑」1小時

Jeremy話,仔女都鍾意迪士尼公仔,覺得同仔女喺街外做運動、接觸大自然,好過只喺屋企或室內玩。

迪士尼今次舉辦跑步比賽共有多達1.3萬人報名,人數破紀錄,當中唔少參加者嚟自台灣、日本等地區。大會話今次同「綠惜地球」等環團合作,如引入可回收膠杯等。不過Jeremy就話大會都繼續派樽裝水,佢買小食時啲魚蛋又用真空膠袋裝住,覺得唔算真係好環保。

上 / 下一篇新聞