港聞

港聞二

下一篇
上一篇

籌備一年 許智峯養「菠蘿包」

【明報專訊】民主黨立法會議員許智峯屋企添咗新成員,唔係佢再做爸爸,係佢8月時喺愛護動物協會領養咗「港短」品種嘅貓仔「菠蘿包」。阿峯同Emily講,因為大女想養貓,佢準備咗成年,希望全家都有多啲心理準備,例如佢本身擔心一對仔女仲細,會當貓仔係玩具,所以要教佢哋有責任心、一養就要養十幾年。直至大女升小學後,佢覺得ready養啦。阿峯好自豪咁話,現時自己上至餵食、下次幫貓仔刷牙都相當熟手。

做仔女嗌交和事老

點解貓仔叫「菠蘿包」?阿峯話貓仔出世頭三個月都住喺寄養家庭,個名係寄養家庭改嘅,佢哋領養時覺得個名好有香港特色,所以繼續咁叫。佢仲話養咗菠蘿包後全家都開心咗,例如仔女會同貓仔追逐、玩波,有時仔女嗌交,貓仔都可以緩和吓,𧨾番佢哋開心一齊玩,仔仔喊時菠蘿包仲會惜番佢𠻹。

菠蘿包活潑得嚟亦相當乖,當阿峯想帶佢出街、一拎個裝貓嘅背囊出嚟,佢就會興奮咁主動跳入去,阿峯本來仲驚佢會抓爛家俬,但結果都冇。而每次阿峯帶佢返立法會議辦,一班同事都會好開心咁撩佢玩,令議辦變身動物園。阿峯又話唔少養殖場環境惡劣,強調領養好過買呀。

上 / 下一篇新聞