港聞

港聞二

下一篇
上一篇

建制泛民齊批官員hea答提問

【明報專訊】立法會內建制泛民議員成日互相批評,但噚日就好齊心,口徑一致批評官員「hea答」議員嘅提問,地產及建造界石禮謙噚日喺內務委員會忍唔住大鬧「官員答問質素非常差」、「我唔知佢講大話定無能」。

石禮謙鬧陳帆 陳克勤鬧黃錦星

事緣石禮謙喺周三(31日)嘅立法會,以書面向運輸及房屋局長陳帆提問有關換地等工程計劃建造住宅單位數目,但局長只係書面簡短話冇按類別統計資料,石批評局長「係咁意答吓你,係不可接受」。民建聯陳克勤聽到就話「我都好勞氣」,話上周三(10月24)問環境局長黃錦星「四電一腦」生效後,食環處有冇統計非法棄置舊電器嘅數據,但當局話無統計,又話計劃成功,「可以咁耍議員㗎咩?」

議會陣線毛孟靜、新民黨主席葉劉淑儀亦先後反映,官員文件同發言稿冇英文版本,認為應該改善。

公民黨郭家麒建議,不如搵次開特別內會,討論官員答問題嘅態度;民主黨黃碧雲仲話,要諗吓有咩懲罰機制,對付拖延答問題嘅官員。內會主席李慧琼聽完之後,就建議大家寫信反映,佢會綜合轉交畀政務司長張建宗。

上 / 下一篇新聞