港聞

港聞二

下一篇
上一篇

波哥派逐字紀錄 證明只係話人「歷史罪人」

【明報專訊】立法會財委會主席陳健波(波哥)之前喺電台節目上,預計「明日大嶼」前期撥款10幾個鐘就處理到,又形容反對填海者係「歷史罪人」。公民黨郭家麒及後提不信任動議,噚日財委會上議員又傾到呢件事。波哥向議員派逐字紀錄,除咗澄清當日講嘅係「歷史罪人」,唔係郭家麒所講嘅「千古罪人」,又強調當日意思係修改《會議程序》後,根據經驗即使係具爭議嘅項目,都只需要10幾個鐘就能表決,但若果議員搵到漏洞、重複提問,「當然需要更多時間」。

謝偉俊:諗清才講少啲麻煩

議會陣線朱凱廸就引用「香港研究協會」調查,46%受訪者反對「明日大嶼」,36%贊成,質疑波哥未開始討論項目已下定論,要求道歉同收返「歷史罪人」論。波哥話如果佢收返說法,民主派唔盲目反對填海,佢願意考慮。謝偉俊就溫馨提示,作為委員會主席「諗清楚才講會少啲麻煩」。

財會噚日亦有傾發展局工務科開兩個常額職位、重新調配三個首長級職位,當中有職位負責大嶼山發展等項目;議會陣線陳志全質疑政府會成立辦事處負責「明日大嶼」項目,擔心到時職能重疊,發展局常秘林世雄強調,有關職位唔只負責東大嶼工程。最終喺31票贊成、14票反對下,財會通過開位。

上 / 下一篇新聞