港聞

港聞二

下一篇
上一篇

泛民發動摩頓臺排球場保衛戰

【明報專訊】政府每區撥款1億元推行「社區重點項目計劃」,灣仔區提出喺摩頓臺拆卸戶外排球場、興建活動中心,爭議都幾大。有關項目排咗上立法會財委會議程嘅第4項,未知今日會議傾唔傾到,泛民噚日就開記者會再表明反對,灣仔區議員楊雪盈話,政府聲稱社區會堂可以容納250人,但原址嘅排球場其實相當窄小,「衰過坐廉航先擺到250人」,甚至30人上台表演都會非常擠迫,隨時有可能跌落台,質疑拆卸排球場興建「納米會堂」係選址不當,要求重新喺社區諮詢,唔應該強推方案。

反對改建作社區會堂

民主派多名立法會議員喺記者會上講明會反對項目,區諾軒就話,議會陣線將就項目提出中止待續、積極發言同埋投票反對。佢質疑項目顯示建制派唔識執政,「畀1億你使,帶來都係劣質管治」,認為應該搵出雙贏方案,例如喺加路連山道興建社區會堂,就唔使拆排球場。

朱凱廸梁繼昌有青春回憶

立法會議員朱凱廸、梁繼昌則大sell對排球場有感情,佢兩個都話自己喺大坑長大,梁繼昌話自己讀中學時每日都會經過排球場,對嗰度好有感情,而唔少外傭都會喺嗰度舉行排球比賽。朱凱廸就話以前經常喺嗰度睇人打波,認為係排球界嘅重要場地。

上 / 下一篇新聞