港聞

港聞二

下一篇
上一篇

UGL事件 林卓廷尹兆堅飛澳洲報案

【明報專訊】民主黨早前發起「天下為公」眾籌計劃,調查前特首梁振英所涉嘅UGL事件,該黨林卓廷、尹兆堅繼早前飛英國後,今晚會飛澳洲會見法律界人士。阿廷話澳洲執法機構收到佢哋電郵後,要求佢哋親身報案,「如果睇完電郵覺得指控子虛烏有、冇任何值得調查嘅地方,都唔會特登叫我哋去澳洲」。

今次佢哋去澳洲,會同法律團隊研究吓關唔關「賄賂外國政要」條例事,因為梁振英收取UGL款項時已經成為特首,UGL亦有可能觸犯當地嘅防止賄賂條例。阿尹話會同當地警方講,梁振英2012年7月上任後,錢果豐就喺同年9月獲委任為UGL非執董、10月續任港鐵主席,而同UGL屬CIMIC集團旗下嘅禮頓建築(亞洲)投得多項重要工程,認為公眾有理由懷疑梁振英係咪透過委任錢果豐做港鐵主席,協助推廣UGL同港鐵業務關係。

英國國家打擊犯罪調查局早前宣布唔繼續調查案件,阿廷強調唔會就此告終,希望「死砌爛砌到底」搵出真相,話如果有得查「南極都去,火星都去」。阿廷又公布「天下為公」早前共籌得223萬元,現時用剩158萬元,佢話去澳洲係搭經濟艙。

相關字詞﹕眾籌 澳洲 禮頓 英國 民主黨 梁振英 港鐵

上 / 下一篇新聞