港聞

港聞二

下一篇
上一篇

梁振英自爆 爭為金庸館主禮

【明報專訊】武俠小說泰斗查良鏞(金庸)前日離世,唔少人表達哀悼、憶述與金庸有關嘅點滴。前特首梁振英(CY)噚日亦喺facebook撰文,話當日文化博物館內嘅常設展覽館金庸館開幕,佢就爭去做主禮,「這是我五年行政長官任期內和同事『爭』做主禮的唯一一次」。

CY話香港以金庸為榮為傲,約兩年前金庸館揭幕典禮,佢偶然喺同事口中知道,佢就話金庸館開幕應該由特區政府最高層主持,以示重視,係唯一一次同同事爭做主禮。佢參觀後覺得香港應該有一個獨立嘅、大規模同地點方便嘅金庸館,仲話不愁無展品同觀眾,如果香港唔做,恐怕其他城市會搶住做。

新民黨主席葉劉淑儀噚日話,佢同金庸現任太太阿May(林樂怡)係遠親,查太係佢奶奶嘅親戚,佢當年離開官場去進修,返港後金庸夫婦主動請佢去酒店食飯,佢對此好感激。葉太話上年撞見阿May,得知金庸開始唔認得人,所以自己亦無去打攪對方。

體育、演藝、文化及出版界議員馬逢國話自己同金庸早有淵源,提到金庸曾為電影公司「長城」寫過劇本,而佢就喺長城同其他3家電影公司合併後嘅銀都機構做過總經理。藝發局2009年向金庸頒發終身成就獎,馬逢國話嗰陣佢係藝發局主席,請來時任特首曾蔭權頒獎。

相關字詞﹕馬逢國 葉劉淑儀 梁振英 金庸逝世

上 / 下一篇新聞