港聞

港聞二

下一篇
上一篇

字眼標點似足泛民區會文件 被指抄襲 陳凱欣單張停派

【明報專訊】立法會九龍西補選本月25號舉行,各候選人開始出政綱講述自己施政理念,不過,食衛局前政治助理陳凱欣嘅一份選舉單張,就被指同民主黨九龍城區議員黎廣偉舊年喺該區區議會嘅文件一模一樣,被批評「抄功課」。陳凱欣競選團隊回覆Emily,話單張製作時錯誤將「參考資料」當成定稿,深感歉意,團隊已經即時停止派發有關單張。

民主黨議員:記者操守去咗邊?

黎廣偉噚日喺facebook出post,話見到陳凱欣有關地區議題嘅單張,但睇睇吓就覺得同佢喺上年9月,聯同另外兩名泛民區議員向區議會提交嘅文件好似。該文件提到九龍城近年有大量內地旅客,但配套設施未能有效處理內地觀光客帶來嘅問題,導致多處出現旅遊巴違泊等,影響居民生活,所以希望政府檢討條例,改善香港旅遊業生態。

黎廣偉上載埋陳凱欣單張比較,可見字眼、標點符號都同份區議會文件一模一樣,連文件提及嘅兩項政策倡議,包括「檢討導遊核證制度」、「提升內地旅客來港觀光旅行團之質素」,陳凱欣嘅單張字眼亦跟足。黎廣偉hashtag質問「記者的專業操守去咗邊」、「大學有無教你plagiarism(抄襲)」等。

工黨李卓人轉載黎廣偉個post,並揶揄陳凱欣係「欣為您.抄足功課」,批評對方做咗15年傳媒,竟然接受到自己傳單抄足民主派議員,質疑對方早前指有「傳媒DNA」,「係新華社通稿,定係抄文當飯食嘅內容農場?」其他補選候選人仲有伍廸希、曾麗文同馮檢基。

相關字詞﹕九西補選 選舉 旅遊 民主黨 emily 陳凱欣

上 / 下一篇新聞