港聞

港聞二

下一篇
上一篇

補選氣氛低迷 區軒跨區貼海報

【明報專訊】立法會九龍西補選下月底舉行,唔少民主派都覺得選舉氣氛低迷,港島立法會議員區諾軒(區軒)前晚就專程跨區到九龍西張貼海報,為工黨李卓人宣傳。區軒噚晚喺facebook發文,話香港眾志黃之鋒同佢講,認為佢身為議員應該去開街站,不過區軒話面對海報不斷被撕,民主派係需要更多人落手落腳,如果唔係條街就會清一色「陳氏(另一候選人陳凱欣)海報」。

區軒形容,無論上次定今次補選,對手「鋪天蓋地打資源戰,卻理屈詞窮」,民主派「徒有論述,(但)輸給一街海報,甘心嗎?」佢話撇除斷然拒絕貼海報嘅商戶,只有一間暗示貼海報有壓力,其他都係佢同朋友一間一間舖咁掙番嚟,形容「背水一戰是這樣實踐出來」。

另邊廂,陳凱欣喺facebook上載探訪劏房戶短片,片中劏房只有60方呎,月租要3000幾蚊,租戶行動不便,加上經濟壓力,每個月畀完租只得番3000幾蚊使。陳凱欣話,好多市民上唔到公屋,只可以不斷捱貴租,建議政府實施租務管制,限制劏房租金加幅。九龍西補選其他候選人包括伍廸希、曾麗文及馮檢基。

相關字詞﹕陳凱欣 李卓人 區諾軒 九龍西立法會補選

上 / 下一篇新聞