港聞

港聞二

下一篇
上一篇

內媒「歌」頌大橋 longest hardest 網民轉載短片 倡張如城主唱

【明報專訊】港珠澳大橋上周三(24日)正式通車,不過客流車流量至今偏低,究竟有咩方法可以刺激用量呢?Emily發現,原來內地《南方日報》早前同大橋管理局合作,喺通車前夕上載一首名為《橋連灣區築未來》嘅大橋主題曲,由該報記者同兩名港澳青年合唱,當中一段形容大橋「最長、最深、最難、最強」嘅英文副歌,好唔好聽見仁見智,不過有網民喺YouTube轉載短片,就吸逾過百個「不喜歡」,讚好只有兩個,民意似乎幾清晰。

呢首主題曲長約3分鐘,兩名被南方日報形容為「網紅」嘅女記者,同兩名就讀內地暨南大學嘅港澳男學生,喺音樂短片中一邊漫步大橋路面,一邊「歌」頌大橋工程同港珠澳三地景色,形容「三地活力,聞名國際,打造一小時經濟圈」。歌曲主要由普通話唱出,副歌就係英文,大讚橋樑最長(longest)、道路最深(deepest)、技術最難(hardest),同連接最強(strongest)。

有網民形容,港珠澳大橋主題曲搵唔到正規歌手演唱係「肉酸」,有人就批評「起條橋都要唱歌」,有人就反建議呢首歌應該畀被網民稱為「亞洲神童」嘅張如城主唱喎。

相關字詞﹕港珠澳大橋

上 / 下一篇新聞