港聞

港聞二

下一篇
上一篇

卿姐自稱畀波哥欺凌

【明報專訊】政府尚未就「明日大嶼」嘅前期研究提供具體資料,立法會財委會主席陳健波日前講明,相信開10幾個鐘會議已可通過有關撥款,引嚟做過財委會主席嘅民主黨前議員劉慧卿批評,波哥其後形容反對填海者係「歷史罪人」。卿姐噚日繼續同波哥隔空駁火,形容自己畀波哥「欺凌」,質疑對方係咪要令議員變成奴才,卿姐透露已邀請波哥出席自己嘅網台節目,唔知到時會唔會擦出更多火花呢?

波哥12月上卿姐節目 備「見面禮」

波哥同Emily講,已答應12月初上卿姐節目,點解成個月之後?佢笑言唔想九西補選期間令人有抽水機會,波哥仲話打算收集網民對卿姐嘅留言,考慮到時送畀對方做「見面禮」,希望卿姐參考吓唔同意見。

卿姐噚日主持網台節目時話,當年擔任財委會主席,運房局時任局長鄭汝樺為咗申請高鐵撥款,都同佢講希望開40個鐘會議,因為知道議員有好多嘢要講,希望畀議員足夠機會發言,卿姐認為呢種做法先正確,令議員「講到唔講」。

鄭汝樺為申請高鐵撥款

希望開40個鐘會

卿姐話財委會主席應捍衛立法會同財委會嘅尊嚴,唔係做政府嘅「強大支持者」,特別當相關撥款有極大爭議,陳健波卻已經向政府示意唔使擔心,批評做法「荒謬、可恥」,又話對方早早就會議時間劃線,猶如橡皮圖章,會引起更多問題。

相關字詞﹕明日大嶼 陳健波 劉慧卿

上 / 下一篇新聞