港聞

港聞二

下一篇
上一篇

當選鐵路小組主席 志明有事走先 港鐵交代4線故障 唔得閒聽

【明報專訊】立法會鐵路事宜小組委員會噚日召開新年度首次會議,第一項議程係選新主席及副主席,自由黨易志明同工聯會陸頌雄當選新嘅正、副主席。但點知易志明新上任「主持大局」無幾耐,就話有重要事要走先,連港鐵交代4線故障事件都唔得閒處理,「交波」畀陸頌雄。

呢個主席位之前係實政圓桌田北辰(田二少)做,但佢今次不獲建制派支持,噚日會議上,易志明同議會陣線范國威獲提名競逐新一任主席,而屬泛民嘅公民黨譚文豪,反而提名田二少。

陸頌雄做副主席

田二少聽到被提名,笑咗幾下再話,「多謝你一番好意,譚議員,𠵱家兩個競爭都幾好嘅,我哋可以有啲嘢睇吓,我唔接納(提名)」,又話對譚文豪嘅好意心領。結果易志明當選。到咗選副主席,范國威再次出戰,對手係陸頌雄,建制派人多,陸頌雄順利當選。

二少唔接受譚文豪提名

新主席易志明同各議員傾完會期內嘅會議日期,同下次會議討論項目後,就話有重要事要走先,連會議討論港鐵4線故障都唔參與。

Emily好奇下就搵易志明問原因,易議員用WhatsApp回覆,話因為要外出開會,又話原本噚日鐵路事宜小組個會只係選正、副主席,所以佢一早安排咗下午其他會議,而討論港鐵事故項目係後來先加嘅議程,所以佢無辦法主持會議喎。

上 / 下一篇新聞