港聞

港聞二

下一篇
上一篇

網民拍下放上網 阿人宣傳車衝燈 司機自首

【明報專訊】九龍西立法會補選候選人呢排四出爭取支持,有網民前日(27日)下午3時許拍到李卓人團隊選舉宣傳車喺深水埗衝紅燈,並將片段上載社交網站。李卓人團隊噚晚陪同司機前往警署主動投案,又話向公眾公開道歉,會一力承擔責任,重申任何人均須注意道路交通安全,絕不容許事件再次發生;而李卓人當時唔喺車上。

向公眾道歉 阿人當時唔喺車上

另邊廂,社福界選委曾健超同Emily講,收到街坊報料話民建聯九龍城區議員邵天虹喺馬頭圍邨搞送拐杖遮活動,把遮由「九龍城區居民聯會」贊助,上面印有「健康常伴你」,「入面夾埋陳健康(補選候選人陳凱欣)嘅單張,叫人支持」,曾健超質疑有賄選之嫌。

派遮被指有陳凱欣單張 區議員否認

陳凱欣曾任九龍社團聯會「健康大使」,陳凱欣競選團隊回應話「無安排任何相關活動」。邵天虹之前陪過陳凱欣「洗酒樓」,佢否認派遮同「健康大使」或補選有關,又話無派埋選舉單張,不過街坊要攞遮就要去佢辦事處登記姓名、留電話;佢話登記係一貫做法,資料唔會用於選舉,又話之後搞活動會注意賄選問題。

九龍西補選候選人仲有伍廸希、曾麗文及馮檢基。

相關字詞﹕李卓人 邵天虹 陳凱欣 民建聯 九龍西立法會補選

上 / 下一篇新聞