港聞

港聞二

下一篇
上一篇

無人機加碼表演 陳奕迅隔籬開騷 美酒佳餚賓客飽嘗眼耳口福

【明報專訊】話說一年一度嘅美酒佳餚巡禮今日嚟到第三日,呢兩日Emily都有去,可能因為未到周末,人流唔算太多。不過旅發局都已經好滿意,仲話因為見到無人機表演大受歡迎,所以今晚會加開一場,而且今晚隔籬摩天輪下仲有陳奕迅演唱會,如果酒客有得「偷聽」,真係一次過滿足兩個願望!

Emily前晚都有好奇睇埋無人機表演,在場唔少行家都話,與其花咁多錢放煙花,不如以後都用無人機表演代替,又環保又慳錢。可能因為見到反應好,所以旅發局今晚會加開一場,兩場嘅表演分別喺晚上6點正同埋7點半。話都無咁橋,陳奕迅今晚6點都會喺中環摩天輪空地搞慈善音樂會,如無意外應該喺美酒佳餚巡禮現場都聽到,大家都可以大飽眼福同耳福!

講開又講,雖然今年旅發局有積極搞回收,但Emily呢兩日都見到塑膠酒杯回收處入面有唔少其他垃圾,例如紙盒,甚至玻璃樽,提提大家開心之餘都要愛護地球,睇清楚環保分類再扔垃圾啦。

相關字詞﹕陳奕迅 旅發局 美酒佳餚巡禮

上 / 下一篇新聞