港聞

港聞二

上一篇

「雙智」挺凱欣 兩大佬撐阿人

【明報專訊】離九龍西補選投票日仲有一個月,各陣營落區之餘唔少得搵名人撐場。獲建制派支持嘅陳凱欣,噚日搵來海洋公園董事局前主席盛智文,一齊喺荔枝角中產屋苑「西九四小龍」擺街站派傳單。

阿欣同Emily講,做記者時已識盛智文,以前每年萬聖節都會問佢蘭桂坊邊間餐廳可以做直播。點解對方肯助選?阿欣話同過盛智文解釋,希望自己可以帶新思維入議會,就好似盛智文將新思維帶入海洋公園咁。

陳凱欣亦喺facebook專頁上載行會召集人陳智思嘅短片,陳智思話早喺阿欣做記者時已經識佢,印象最深刻係對方離開政府後、喺選舉之前都積極參加社區活動、幫助市民,覺得佢好有熱誠。

代表泛民出選嘅工黨李卓人,噚日喺石硤尾、馬頭圍邨等地擺街站時,泛民多名議員亦到場幫手宣傳,包括朱凱廸,仲有民主黨主席胡志偉、公民黨黨魁楊岳橋。

人哥喺fb話,好多街坊走埋嚟同佢哋講加油,反應好好,佢強調民主派團結一致,一定可以贏番被DQ嘅議席。阿人又推出短片反對「萬億人工島」,片中阿人不斷睇海,話希望下一代都可以睇山睇海,而唔係只見到石屎森林。

退出民協參選嘅前議員馮檢基,噚日就一個人喺美孚港鐵站外派傳單。獨立候選人伍廸希就上載截圖,話自己開咗ig帳戶宣傳。候選人仲包括曾麗文。

相關字詞﹕民主派 民協 海洋公園 楊岳橋 emily 民主黨 李卓人 陳凱欣 馮檢基 立法會

上 / 下一篇新聞