港聞

港聞二

下一篇
上一篇

無直接講侍產假「一日都唔應該有」 張宇人自詡幫到傳媒賣紙

【明報專訊】立法會噚日通過男士侍產假增至5日嘅條例草案,過往不時喺勞工政策發表惹火言論嘅自由黨主席張宇人,發言時講到自己為新聞自由都有貢獻。何解?張宇人話,自己從來無直接講過侍產假「一日都唔應該有」,指傳媒鍾意用觸動人神經嘅言語,自己講嘅說話同埋「廿蚊張」呢個「江湖稱號」,似乎幫到傳媒「賣多幾張紙」,形容自己對新聞自由都有啲貢獻。

無綫《新聞透視》8月初時探討侍產假並訪問張宇人,當時佢喺節目度批評勞工界:「你以為7日他們會收手嗎?7日便會有14日,14日便會有1個月、1年,然後便罵你哋僱主無良、不停地罵,他們永無止境的苛索,他們不會停在一個位」;又話當年「以前我哋無侍產假又點?以前我哋太太無產假又點?」

稱侍產假言論由主持講出

張宇人話,「侍產假一日都唔應該有」呢句說話係由節目主持講出嚟,透過剪接喺佢發言中間加插,其後被多次轉述。佢強調,節目同時引述佢認為侍產假「三日應該止步」呢句說話,但就被人忽略,證明無論係批評者定傳媒,都無詳細睇個節目,形容新聞報道都係「斷章取義,唔睇前言後語」。

張宇人繼續反駁批評者,話佢哋應該「攞塊鏡照吓自己」,佢話身為僱主幾十年,未必係好僱主,因為佢無能力做到,所以接受批評;但形容有啲人「打僱主荷包」、「做闊佬」,往自己臉上「貼光」,佢奉勸呢啲人反思佢哋點對待員工。不過,張宇人話由於自己身兼行政會議成員,所以都會支持草案。

相關字詞﹕侍產假 張宇人

上 / 下一篇新聞