港聞

港聞二

上一篇

黃國健為侍產假勞氣 驚動副局「箍票」

【明報專訊】立法會噚日恢復二讀審議《2018年僱傭(修訂)條例草案》,討論將男士侍產假由3日增至5日,立法會主席梁君彥早前以涉「新增職能」同要額外畀公帑為由,拒絕相關法案委員會主席黃定光提出最少每年檢討侍產假日數嘅修正案,工聯會表明對呢個決定好失望。噚日工聯會立法會議員黃國健(KK)喺會議廳外再同Emily講呢件事,愈講愈勞氣,驚動到正喺立法會準備嘅勞工及福利局副局長徐英偉同政治助理馮興禮,兩人齊齊行埋去向KK「箍票」。

KK同佢哋講,工聯會雖然一直爭取7日侍產假,但唔會支持延長侍產假至7日嘅修正案,因為有違勞顧會共識。不過,KK批評用「要加位、涉公帑」做藉口,而唔肯每年檢討侍產假日數係唔公道,覺得政府用現有人手都做到檢討。

鬧政府用藉口拒絕年檢

講到加位,徐英偉乘機同KK拉票,話局方嚟緊會為處理強積金對冲問題加位,希望得到佢支持。一件事還一件事,KK話處理強積金對冲又真係多嘢做,佢會贊成。

相關字詞﹕勞工界 勞顧會 工聯會 黃國健

上 / 下一篇新聞