港聞

港聞二

下一篇
上一篇

大橋通車 區議員帶珠海快閃團

【明報專訊】港珠澳大橋噚日正式通車,唔少旅行社都舉辦「首發團」,帶旅客率先體驗大橋,再去旅遊。除咗旅行社,原來有區議員都為街坊搞首發團,Emily噚日下晝約3點喺香港口岸準備登上金巴(大橋穿梭巴士)前往珠海時,碰巧撞到民建聯中西區區議員楊開永,原來佢正帶住約80個街坊取道大橋去珠海即日遊。

街坊話昔經虎門橋「又苦又悶」

楊開永當時正準備上另一架金巴,Emily為免耽誤佢嘅行程,同佢寒暄咗兩句,再幫佢同團友影張相就道別。楊開永之後透過短訊回覆Emily,佢未有透露首發團團費,但就話街坊見到大橋咁壯觀,都感到開心雀躍,街坊並反映以前取道陸路去珠海嘅話,要經過虎門大橋,可謂「又苦又悶」,現時就快得多喇。

楊開永話,團友去到珠海欣賞一齣講述北京圓明園歷史嘅戲劇,夜晚約7點就坐番金巴返香港,即係團友喺珠海逗留咗約3個鐘頭就離開,可謂非常快手。

相關字詞﹕港珠澳大橋 民建聯

上 / 下一篇新聞