港聞

港聞二

下一篇
上一篇

議員新形象示人 「唔認得黃碧雲」

【明報專訊】立法會放咗近3個月暑假,唔計特首林鄭月娥本月10日喺大會宣讀《施政報告》,噚日係首個立法會正式大會。一班議員放完暑假返嚟,有人換咗新形象。好似民主黨黃碧雲,早前因為右眼視網膜黃斑點位置內膜撕裂,要做手術,手術後近視由800幾度減到去150度左右,暫時無戴眼鏡(圖1)。碧雲話,公民黨陳淑莊等議員同佢講唔認得佢,自己都詫異唔戴眼鏡係咪真係咁大分別。

另一個形象唔同咗嘅係經民聯梁美芬,佢趁住暑假減肥,好多議員都讚佢fit咗,關心佢點減,佢同Emily講自己都有乘機買吓新衫。

漁農界議員、民建聯何俊賢喺暑假將頭髮剷到勁短,噚日仍然保持住呢個髮型,笑言𠵱家朝早起身唔使gel頭,呢個髮型方便做嘢。佢話,自從《施政報告》提出「明日大嶼」計劃,佢就不停落區聽漁民意見,希望政府諮詢業界前諗定「條路畀漁民行」。佢嘅黨友蔣麗芸就好客氣,請一班記者朋友食西餅,笑言係覺得大家鬧少咗佢,順便向大家介紹佢新請返嚟嘅助理。

相關字詞﹕蔣麗芸 梁美芬 張國鈞 何俊賢 立法會

上 / 下一篇新聞