港聞

港聞二

下一篇
上一篇

許智峯逾期加入工務小組押後處理

【明報專訊】立法會工務小組委員會噚日會議時,先處理民主黨許智峯逾期加入委員會申請。阿峯喺今個月16日已經去信委員會解釋理由,過去呢啲處理相對簡單,但噚日會議結束,都未能處理佢加入委員會嘅要求。建測規園界議員謝偉銓會上稱,阿峯應該親自喺會上解釋,咁樣「公道啲」。由於阿峯當時不在席,主席盧偉國話押後處理。

公民黨陳淑莊就唔同意,話阿峯已經喺信中解釋理由,建議投票決定係咪畀阿峯加入,新民主同盟范國威都認為可以投咗票先,之後再叫阿峯補交解釋。民建聯陳恒鑌就重提,之前有建制派申請逾期加入委員會,泛民同樣要求先問番相關議員,所以今次都應該按過去方法處理。

許:當初無加入因撞時間

盧偉國最終決定議程延後到會議後段先處理,喺會議結束前,阿峯現身解畫,解釋當初無加入,係因為同其他公務時間撞咗,安排到時間後亦認為會議重要,所以想加入番。謝偉銓聽完阿峯解釋唔收貨,要求下次會議先投票處理,獲主席盧偉國接納,阿峯要等多兩個星期先知入唔入到委員會喇。

相關字詞﹕許智峯 立法會 工務小組 謝偉銓

上 / 下一篇新聞