港聞

港聞二

下一篇
上一篇

採訪大橋 記者「入閘」熒幕現個人資料

【明報專訊】港珠澳大橋噚日朝早舉行開通儀式,可能因為國家主席習近平出席儀式,所以會場內外嘅保安都非常森嚴,Emily同一班中外傳媒行家,喺儀式前要提早大約3個半鐘接受安檢,如果帶咗飲品,就要喺保安人員面前試飲過先可以進場。記者佩戴嘅採訪證相信係有辨識技術,記者經過安檢閘口時,隔籬嘅熒幕會自動顯示記者姓名同所屬機構。

Emily前後一共經過兩次安檢、檢查咗4次證件,最終成功「入閘」,見證習近平講咗唯一一句「我宣布港珠澳大橋正式開通」。舉行通車儀式嘅珠海口岸旅檢大樓,亦有大批警車喺大樓外停泊,警員分組喺大樓內外巡邏,連會場嘅廁所外都有兩名保安人員駐守。

而喺大橋外圍嘅情侶路,保安都相當嚴密,有香港行家想喺通往珠澳口岸人工島嘅引橋入口影相,都即刻被警員驅趕。Emily噚日下晝都有經過引橋入口位,見到附近起碼有30名警員,唔少經過嘅車都被警方截查;引橋入口位又一度有20、30架私家車同貨車,等警方放行畀佢哋進入人工島,相信係要為今日嘅正式通車做準備。

上 / 下一篇新聞