港聞

港聞二

下一篇
上一篇

5點半早餐6點半安檢 1分鐘都不能遲 大橋開通禮 貴賓禁帶手機

【明報專訊】國家級基建港珠澳大橋今日舉行開通儀式,一眾獲邀出席嘅建制派、嘉賓及官員,噚日百幾人一齊搭政府包船去珠海。今次活動大家都知有國家領導人出席,保安極嚴密,主辦單位人員向嘉賓講明,今朝5點半食早餐,6點半至7點半安檢,9點舉行儀式,10點40分完成典禮,仲講明大家一分鐘都唔可以遲到。至於記者,就要提前喺6點10分集合做安檢。

泛民無獲邀

陳恒鑌:要諗吓點解

港府邀請嘅嘉賓,噚日下晝4點浩浩蕩蕩由上環坐船去珠海,香港隊伍由特首林鄭月娥率領,其他出席者包括前特首梁振英,一眾人大代表、政協常委,部分建制派立法會議員等。內地人員提醒,因保安理由,今日唔准帶任何電子儀器出席活動,包括手機同相機,咁大家應該唔可以再影瞓身撐大橋「打卡」等相片。

今次活動「安全系數」要高,泛民無獲邀請。有份去珠海嘅民建聯陳恒鑌噚日就喺電台上話儀式由珠海主辦,「(內地單位)都唔知香港係點,見到電視畫面,有班人逢親(出現)場面都好鬼亂」,可能因此擔心有隱憂,佢又話「要考慮點解我哋香港立法會會畀人有一種咁嘅印象」。

另外,醫學界議員陳沛然就喺facebook話有收到邀請,但因為有活動及睇症,未能出席。

林健鋒生日撞正儀式日

公民黨譚文豪則批評「唔係自己友就請都唔請」,認為大橋工程用咗香港大量公帑,即使獲邀都唔會出席。另外,原來經民聯林健鋒今日生日,可以同大橋開通一齊慶祝,佢黨友就早一日安排飯局同佢賀壽,佢個仔林凱章都有嚟。林健鋒生日願望係身體健康同家庭幸福,黨友梁君彥就祝佢早日做老爺!

上 / 下一篇新聞