港聞

港聞二

上一篇

湯家驊批反對明日大嶼口號空洞

【明報專訊】《施政報告》發表後,市民對「明日大嶼」都有唔少反對聲音,行會成員湯家驊(Ronny)噚日喺港台節目《給香港的信》就為撐施政報告而批評咗唔少人。佢話反對「明日大嶼」嘅聲音好多,但冇一樣有事實支持,只係因為資訊錯誤而嚟嘅空洞口號(empty slogans)。佢又批評前特首曾蔭權任內停止建公營房屋,導致現時出現短缺。

Ronny早前形容今年施政報告係「歷史性」,佢噚日喺信中寫,一來特首林鄭月娥改變咗公共財政態度,前財政司長曾俊華掌管庫房超過10年,成日話要未雨綢繆,又成日低估香港財政收入,喺政府庫房「水浸」時只願意一筆過派糖,最終𠵱家有逾萬億儲備。Ronny又大讚林鄭做咗歷屆政府唔想做、或唔願做嘅事,包括取消強積金對冲,及將產假延長至14周。

Ronny亦暗批傳媒同評論員只關注「老是常出現」嘅政改、23條立法討論,好少睇管治哲學改變,或對香港未來嘅願景,「這就是我們媒體、評論員的質素」。

上 / 下一篇新聞