港聞

港聞二

下一篇
上一篇

局長議員齊渡海 羅致光:好大浪,返到嚟已好開心

【明報專訊】噚日係一年一度嘅維港渡海泳,官員同立法會議員亦有代表參加。勞工及福利局長羅致光(CK)、環境局政治助理區詠芷同埋會計界議員梁繼昌今年亦繼續參與,今次仲加入新成員,商務及經濟發展局政治助理馮海容同民建聯議員鄭泳舜。CK、梁繼昌同鄭泳舜,分別都以約25至26分鐘完成渡海泳。

鄭泳舜:少少油味可接受

CK同特首林鄭月娥、環境局長黃錦星主持鳴槍儀式後,就快快手準備參加優悠組。第二次參加嘅CK完成後話 ,噚日海面好大浪,拋得好誇張,返到嚟已經好開心,仲講笑話數唔到自己飲咗幾多啖水。CK又話自己今年游得比較好、直接啲、冇偏離賽道,唔似得上年咁有獨木舟提佢游去正確方向,所以同隊友差不多時間到達終點。

梁繼昌叫黃錦星明年落水

「處男下海」嘅鄭泳舜就覺得今次經歷好特別,平時玩開三項鐵人嘅佢試過喺泳灘旁邊游,但就覺得喺海中心感覺好唔同。佢覺得維港水質唔錯,但有少少電油味,不過可以接受,仲大讚香港人好守秩序。

「前輩」梁繼昌就話今年分批出發嘅安排好,但海面有啲大浪,邀請大家下年齊齊參加。黃錦星喺facebook貼相兼引述參加者大讚水質好,梁繼昌就留言邀請對方下年一齊參加:「局長,你明年『係咁意』都要落吓水,我期待!」

相關字詞﹕梁繼昌 渡海泳 鄭泳舜 羅致光 emily

上 / 下一篇新聞