港聞

港聞二

下一篇
上一篇

何志平案選陪審 問睇乜電視節目

【明報專訊】民政事務局前局長何志平涉嫌賄賂非洲國家政要嘅案件,原本下月喺美國開審,最近美國法庭又話會延遲。不過,當地法庭透明度好高,不時更新控辯雙方提交嘅文件,其中控方美國政府最近建議要向候選陪審員問55條問題,除咗要求法庭要每人交代背景資料如職業、教育背景等,仲建議問埋佢哋近期最常睇乜嘢電視節目、報紙同雜誌。

何志平被控8項涉賄賂及洗黑錢控罪。呢單案到時要揀陪審員,為確保公平審訊,控方就建議挑選陪審員嗰陣要仔細問清楚佢哋,同被告、涉案者、律師團隊、美國聯邦調查局(FBI)等人員有無關係。由於案情牽涉乍得同烏干達政要,控方就建議問埋陪審員有無喺當地做生意,或者有無對呢啲地方有強烈正面或負面感覺。

控方除咗要求法庭問陪審員最常睇乜嘢電視節目,仲想了解埋佢哋嘅嗜好同消遣活動,睇嚟要成為呢件案嘅陪審員,都真係唔係咁易。

相關字詞﹕陪審團 何志平涉賄案 何志平

上 / 下一篇新聞