港聞

港聞二

下一篇
上一篇

麥德正帶導賞團多年 灣仔人講灣仔鬼古

【明報專訊】唔少社區人士近年都搞導賞團,等參加者了解當區歷史文化,原來東區區議員、工黨副主席麥德正已經喺灣仔帶咗導賞團十幾年,仲要係以鬼古為主題。阿正同Emily講,佢由細到大都係灣仔人,聽埋唔少當區鬼古,2004年開始帶灣仔鬼古團。導賞團必去幾個「猛鬼景點」,包括船街鬼屋、星街、修頓球場同紅燈區,可以行足幾個鐘,最多試過一團成六七十人𠻹。

阿正自己冇撞過鬼,但佢多次帶團到星街一帶時,都有團友話頭痛、周身唔聚財,佢話星街喺戰爭時期係防空洞,傳說曾經有炸彈喺入面爆炸,死傷枕藉。阿正又話灣仔修頓球場一帶打仗時期被炸彈轟炸,啲屍體唔知點處置,就埋喺炸彈坑,所以都猛鬼喎。信不信由你。

至於點解開始帶團,阿正話佢去過愛丁堡,當地有唔少鬼古團,除咗講靈異嘢,仲會講解瘟疫、戰爭等歷史嘢,背後意思就係要保育自己文化、發展社會更好,唔好再畀呢啲恐怖嘢發生。阿正話希望藉住帶團,保育自己社區嘅傳說;不過佢話當選區議員後比較忙,𠵱家都冇乜時間帶團,雖然有街坊有興趣,但都要再等等。

相關字詞﹕灣仔 工黨 保育 emily

上 / 下一篇新聞