港聞

港聞二

下一篇
上一篇

籲上載fb 「守護下一代將來」 團體一人一相反明日大嶼

【明報專訊】《施政報告》提出「明日大嶼」願景,建議喺交椅洲、喜靈洲一帶填海1700公頃造島,引來市民反對,短短幾日已有5800人(警方估計最高峰)出席遊行。傘下爸媽、家長聯盟、進步教師同盟和高教公民等團體噚日發起「我們沒一萬億,但有萬顆堅定反對的心」行動,發起facebook上載「一人一相」,收集市民反對「明日大嶼」計劃嘅原因,打算喺11月初立法會表決《施政報告》致謝議案前,向特區政府同全體立法會議員展現反對嘅決心,「一起守護下一代的將來,我們不能愧對下一代」。

參加方法係喺白紙上打個大交叉,寫上反對「明日大嶼」原因,完成後影張相post上fb,再加hashtag「#萬顆心堅決反對明日大嶼」。發起組織會將大家嘅相輯錄,交予特首辦同立法會秘書處,轉交全體立法會議員。

進步教師同盟召集人韓連山話,目標希望有過萬人參與,喺網上鼓勵大家一人一相,流傳率高,希望引起多啲人關注「明日大嶼」計劃。唔少民主派議員都有參與計劃,好似人民力量陳志全張相就批評「明日大嶼」係倒錢落海,公民黨黨魁楊岳橋就話政府應善用棕地。

陳健波拍片:唔填海一定後悔

另邊廂,保險界議員陳健波噚日拍短片撐「明日大嶼」,仲話要反駁泛民嘅歪理。佢話填海睇落好貴,其實經賣地同攤開十幾年去畀錢開發,根本不成問題,「所謂先發展棕地、農地如果咁容易,就唔使搞咗十幾年都冇進展,如果唔填海,十幾年後都係得個桔,一定會後悔」。

相關字詞﹕民主派 陳志全 明日大嶼

上 / 下一篇新聞